DivertiMento's Plauder-Lounge

Berüehmti Persönlichkeite

Sunneschii - 19-4-2013 um 12:26

Heii zämä!!

Ich han denkt, ich tue mol es neus Thema zum plaudere uuf. Und zwor han ich das imere andere Forum gseh, und han denkt, das wer doch au öppis für üüs. I ha ide Suechfunktion gseh, dass es das no nöd git do bi üs ;)

Ich finds nämlich mega spannend, anderne Lüt ihri Erfahrige mit Promis, womer normalerwis nur us em Farbradio und de Hüehnerpress kennt, z ghöre.
Was hend ihr scho alles für A bis Z Promis troffe? Kennet ihr sogar öppert bekannters persönlich? Und i wellem Zemehang sind ihr ine begegnet? Würkets uf eu eher bodeständig oder abghobe?

Söll ich gad emole afange? Do weret Lüt gsii wie d Christa Rigozzi, die küsst eifach alles wo ere in Weg chunt; de Ex-Mister wo ez afangt singe, i glaub er seit sich ez Jan Oliver oder so; Christine Stückelberger & Steve Guerdat kenn ich eifach well mir sich unter de Riiter halt schnell mol begegnet; natürlich d DivertiMentos; Usain Bolt, Yohan Blake, usw a verschiedene Liechtathletik Meetings troffe; Walter Andreas Müller, de isch eifach de Hammer, so en bodeständige Promi hani kes zweits mol troffe; Tranquillo Barnetta mol am Bahnhof gseh; de Jörg Schneider;Karin Keller-Sutter; Linda Fäh; es sind no es paar meh gsi, aber die fallet mir ez gad nöd i, wennis wieder weiss, schriebis no dezue ;)

I freu mi scho uf eui Gschichte!

funny_girl - 20-4-2013 um 14:28

D'Mia Aegerter (die wo bi "Achtung, Fertig, Charlie!" mitgspielt het) isch mol binere Divertimento-Show nebet mir i de 1. Reihe gsesse.

meimei5Stacks - 20-4-2013 um 21:27

Ig bi viu, viu cooler, mini Schwoscht isch früächer ganz guät mit em Luca Hänni befründet gsi. (soo kuhl, niid? :lol: )
Und de isch er öbe mau z'gseh gsi ^^

Und d'Christa Rigozzi und d'Sängerin vo Tinkabelle si mer denn zu mau nach der Live-Show ''Check-In'' vor der Nase dürägloffe.
Hed mi aber nid witer nervös gmacht, ha liäber uf DivertiMento wöue warte.. ;) ou we mä a däm Abe nüd meh vo ihne gseh hed ^^
Uf jedä Fau hani am Sven Epiney bim ässä zuägluägt :smilegrin:

Und dr Leadsänger vo QL chunt iz de ou zum 2te Mau zu üs, wäge me witere Alass vom Turnverband us, da üsi Leiterin Fründschaft gschlosse hed :cool:

Ah und no es paar Outogrammstundenä mit em Mike Schmid und vo denä Miss Schweiz hani ou no äs paari und dr ganz FC Thun natürlech :bigsmile:

funny_girl - 20-4-2013 um 22:02

Mir isch no meh in Sinn cho:

Aso de Toni Brunner hani scho mehrmols gseh... (nöd wiiter verwunderlich, de wohnt jo nöd so wiit eweg...)

Und d'Divertimentos hani s'erscht mol in echt gseh, woni grad mol en Fernsehusschnitt vonene kennt ha. I ha das aber au erscht im Nochhinein tschegged, wer das gnau gsi isch... (Ihr kenned das jo sicher au: Mer gseht irgendwo öpert, me weiss eifach, me het die Person schomol irgendwo gseh, aber mer chunt eifach nöd druf wo...)

Und de Marc Sway isch bi de Iiweihig vom neue Hallestadion (das isch irgendwie au scho lang her...) a mir verbii gloffe.

Jo, das isch glaub so zimlich alles, was i cha a dürftige Nähchäschtliplaudereie büüte...

I bi aber überzügt, dass ich i 20-40 Johr mol cha säge: "Mit dem Bundesrot bini id Schuel." I bi dank mine Kanti-Extrarundene i gnueg Klasse mit mögliche Kandidate gsi... :)

Sunneschii - 21-4-2013 um 15:00

Ah joo stimmt de Toni Brunner, dem bini au scho es paar mol über de Weg gloffe, und de Christoph Mörgeli (uf de hetti guet verzichte chöne).
Haha und de Hansjörg Walter isch mol mit sim riese Traktor i üses Auto inegfahre. Denn het er bi üs aglüte zum d Reparatur z zalle und i ha s Telefon abgnoh, i cha also sege, dass ich mit em ehemals höchste Schwiizer telefoniert han :lol:

Haha meimei, es Stelldichein mit em Luca :smilegrin: Naja, i bi ned sin grösste Fän...

Wenni mer so überlegge, a wievill Promis ich wohrschinlich scho verbii tschalpet bi und s ned gmerkt han...

fallen angel - 28-4-2013 um 18:26

oh je... i weiss doch sicher d helfti nüm, abr i probieres iz mal...

aso, d divertimentos. live und in farbe troffe, hani di zwe zum allererschte mal z bern. d show plan b isch denn gspilt worde. ussert es autogramm und es 'hallo, wi isch di name?' isch denn nid dinne gsi. da isch de emmenbrücke scho e bitz besser gsi... (hey, wüsset der no??? so kuul gsi, denn!!!) :lol: :lol: :lol:

denn im zämehang mit de divis, hani dörfe tempesta kenne lehre. aso, de reto, de ruedi, de armin und de pasci. zum erschte mal bem let's fetz in einsiedeln troffe u plauderet u fotos gmacht. :smilegrin:

denn hani mal z züri de gian franco... ah nei, sorry... s isch ne nid persönlech gsi... nume es double... :fake sniffle:

aber z züri ir bahnhofstrass hani mal de marco rima troffe. s het gad afa schiffe une kollegin u i sinim zuefälligerwiis begägnet. hei churz mit ihm pläuderlet u es autogramm hets ou no gä. :smilegrin:

u zum schluss no e prinz... uf der arbeit hani mal e sim charte registriert. u zwar ufe prinz von und zu liechtenstein. (de genau name weisi aber nüme). :smilegrin:

meimei5Stacks - 7-5-2013 um 22:34

Was mer no gad ih Sinn chunt, we mä z'Thun ungerwägs isch gseht mä dr Mike Shiva o äs paar mau :smilegrin:

Und dr Slädu (Gitarrischt vom Bligg) isch mau gad näbe üs i eim vo denä zwöi schönä Ärdhüser gwohnt :)

Vivi - 17-12-2013 um 21:40

Ohh luschtige Thread... Ohhh so viel besser wie lerne :-)

-Also de Alain Sutter (ehem. Fussballspieler, de mit de viele Haar) isch mal bi eus am Chuchitisch gsässe... Glaubs sogar zwei Mal, willer zerscht eini vo eusne Wohnige het welle miete... Hetter denn doch ned gmacht, aber immerhin hets es Autogramm gäh :-)

-De Carlo Janka (Skifahrer) hani schomal in Obersaxe gseh, willmer im gliiche Restaurant/Bar gsi sind... Aber det hani ken Piips gseit, will ja, das isch ja sis dihei, det isch mer schön diskret.. ;-) Autogramm hets denn geh woner mal a die Schuel cho isch, wo mis Mami schaffed...

-Ahja und mit em Linard Bardill (Liedermacher, Schriftsteller) hani Spaghetti gässe... Isch aso es super Typ, aber an Dialekt musch di scho chli gwööööööhne :-)

Jaaa und denn hemmer natürlich na d Divertimentos, die gänd so schön geduldig autogramm... :-)

funny_girl - 3-3-2014 um 16:33

Hüt isch de Michel Gammetaler (oder wie au immer me da gnau schriibt) bi mir am Schalter gsi. Aso de isch definitiv au privat ned ufs Muul gheit. Aso positiv gmeint!