DivertiMento's Plauder-Lounge

Tourbricht Gate 10

 Seiten:  1  

Nic - 25-1-2012 um 10:36

s chönnt sich nochli zieh. mit em tourbricht vo geschter abig. aber nur mal sovill voreweg: die show wird hammer!

het es paar ganz geili figure drinn. und es paar no besseri... und susch alles, wo mir eus ja scho gwohnt sind: wort, witz, lacher, musik, tanz, no meh lacher, und das schlag uf schlag.

something old, something new, something borrowed, something blue. oder wie heissts doch so schön, söll glück bringe. es isch alles derbii gsi. alti figure natürli de jk (mit eme uftritt mit genau sinere chragewiiti), de gian franco (het ändlich e job gfunde wo genau sis tempo vorgit). neui figure und ned zu knapp: buuchredner, turner, tuube, sänger, tänzer, und de räscht fallt mer uf die schnelli nüme ii. aber au usglehnts wie de bligg, phil dankner und de peach. und blaus hets au gha. blaus liecht, vill rauch, und bühne frei für ... löhnd euch überrasche. aber vill meh hets goldigs gha. goldigi jacke zum bischpil. oder es goldigs wc bürschteli. aber wieso sich divertimento do drüber gfreut händ, das spar i mer für de usführlich bricht uf.

es isch ja geschter z bade erst es try out gsi, aber wenn sich die show glich entwicklet wie plan b, denn chönnd ihr euch mal uf es füürwerk sondergleichen iistelle. das isch öppis wo sicher isch.

Cheyenne - 25-1-2012 um 12:22

Meh mags nid für möglich halte :lol: Aber ha jetz nur dr erscht Satz gläse. Musch also nid pressiere, gäll. :cool:

Ich möchts uuuuuuunbedingt zerscht mit eigene Auge gseh ha. I ha mir genau nüt verrote loh. Also, bis denn muessi mi do glaub abmälde. D'Versuechig wär viel z'gross. :lol:

Bi aber froh, dass meh vo überall här und durs Band nur positivs Feedback ghört.

Nic - 25-1-2012 um 12:35

chey, das chasch scho läse. staht nonig vill drinn. aber dr usführlich tourbricht söttsch de vilicht ned läse.

Nic - 25-1-2012 um 12:38

also do mol dr tourbricht vom try out z bade geschter. warnig a alli die, wo zerscht live wänd go luege und sich überrasche lah. genau jetzt ufhöre läse. jetzt.











immer no wiiter läse? ok. uf eignigs risiko. aber au wenns der aschiin macht, de bricht seig usführlich. isch er ned. die show, die muess me live gseh ha.



international airport baden boarding 24. januar 2012 20:00



10 jahr, e langi ziit zum zäme uf de bühni stah, do kennt mer sich in- und uswändig. ziit zum mitenand mal id ferie gah. ibiza? stockholm? mer isch sich einig. de manu und de michi äääh charly äääh jonny. ja das mit de näme isch sone sach. wer heisst scho jonathan. sicher niemert im publikum. niemert ussert de i de erschte reihe. ich glaub das wär ned so vorgseh gsi. aber s opfer für was au immer no wird cho, isch scho gfunde.

afange tuets ja scho guet, für das, dass sie sich blind verstöhnd, händs grad rächt vill uszdiskutiere. aber sie mached ihre job ämol guet. uf de bühni stah und witz mache. au wenn de manu do dervo nüüt weiss.

und denn das au no. do göhnds einisch zäme id ferie, s ichecke isch no riibigslos gange. und denn die durchsag. wer kennt sie ned. dr flüger het verspötig. während em warte gseht mer so einiges.

ursula lüscher am info desk. das chunnt guet. sie schlaht sich dure. her iinglisch is nöt enöff. glich chan sie hälfe. gou streiit änd denn ask. mit ussländerisch het sies allgemein ned so. französisch, holländerisch. alles gaht. irgendwie. nöd würklich. sie channn daaaas.

und ihr chönnd euch ja gar ned vorstelle, was es a some international airport so alles für strassemusiker het. bekannti und unbekannti, gueti und weniger gueti, und denn ebe no die andere. keini 0815 type. 0816 seigeds. markus und thomas zum bischpil. free jazz studente. siit 18 jahr macheds zäme musik. siit 3 jahr vor publikum.

aber au ganz wichtigi lüüt werded erwartet. en gwüsse aleks pompööof. russische gschäftsmaa oder so. do wird s militärspiel ufbotte für e würdige empfang. nussknacker vom tschaikovski. unter de leitig vom jonny. und em jonny.

aber was sich die zwei divertimentos scho lang gwünscht händ: mal a sonere oskar verleihig derbii z sii. also ned nur derbii, sondern au no e priis z becho. und s publikum isch natürli so flexibel und erfüllt ihne de wunsch. freiwillig. gaaanz freiwillig. und hochmotiviert. vor allem de jonathan us de erschte reihe.

also do no en chliine tip vo mir. sitzed nie, also niiiieeee i die erscht reihe. oder leged zumindescht öppis echli glamouröses aa. und es isch jo so, das hani nonig gschribe, am dsischtig isch so gsi, dass d sitzplätz unnummeriert gsi sind. also de jonathan und sini begleitig händ sich die plätz i de erschte reihe hart erkämpft. und sind stolz gsi druf. bis genau zu dem moment… ich weiss scho, werum ich i de vierte reihe ghocket bin.

chönnd ihr euch vorstelle, dr manu und de jonny i ihrere eigente vorstellig i de erschte reihe sitzend? göhnds eu go aluege! dr jonathan het denn au ganz souverän dur die film priis verleihig dure gführt.

and the winner is: wert hettis dänkt? jonny fischer und manu burkart! stolz sinds gsi, sone priis bechunnt mer ned all tag!

sone priis händs no nie becho. obwohl die zwei jo scho vill zäme gmacht händ. schlagerstars aagseit. ja die kenned sicher. die zwei goldige. halli und galli . übrigens jetzt scho mini lieblingsnummere. chli z vill vo allem. bis is detail. z vill gold. z vill schleimig. z vill dialekt. z vill gueti luune. z vill ego. z vill haarspray. z vill belüchtig. und vo de musig wett i gar ned afange.

und die nummere wird no vill besser, wenn ihr euch als verglichsbild de manu vorstelled, de manu mit tempesta uf dr bühni…

au es altbekannts gsicht schaffed am flughafe. dr gian franco. ja nach em tourändi letscht mai het er sich müesse neu orientiere. probiert het er’s als gratisziitig verchäufer, als verchäufer vo wireless kabel, im gartecenter und als securitas bi fuessballmatch. aber die händ ächt ned sis arbetstempo. jetzt isch er bim zoll. zueständig für die pieps-türe. und für d droge vernichtig. genau sin job. wenn nur das grät ned immer kaputt wär. aber e rächte huuswart chan das flicke.

aber ned nur im flughafe gits interessants. au usserhalb. und so e brieftuube chan einiges verzelle. und das macheds denn au de federico und s ruthli. aber nur scho d kostüm sind bi dere nummere dr hammer.

während em warte chömed no alti ufnahme füre vo damals, wo de jonny und de manu no zäme i de jury gsässe sind vo dere swiss talent show. und was die zwei do so alles händ müesse aluege:

de roger und de andré alias duo luft und bode. leider langeds ned ganz zum wiiter cho. trotzdem schöni trainigs-azüüg.
de freddy mit em knut (au do, scho elei für s kostüm bruchsch es suurstoffzelt). buuchredner.
und de jk. klar. e neue song (kei ahnig um was das es gaht. aber düütsch-düütsch het er glaub extra glehrt derfür). und zaubere chan er jetzt au.
gsanglich sind aber au s quartett the magic four ganz stark.


last call for flight number sowieso to stockholm. passagiere fischer und burkart bitte zu gate 10.

zum schluss denn no es musikalischs finale, zäme mit allne figure wo die letschte 10 jahr uf de bühni gstande sind. the circle of 10 jahr zäme uf der bühni. the wheel of fortune.



ich weiss zwar ned, was alles ned so gloffe isch, wies hetti sölle. aber schief gloffe isch sicher nüt. ich glaub ned nur für mich ischs alles in allem ganz e glungne abig gsi. standig ovation isch de ernst gmeint gsi. wenn i drah dänke, dass das erscht es try out gsi isch, mag i mer gar ned usrächne, was das für e hammer-show wird geh, wenn denn mal würkli alles perfektioniert isch. absolut empfehlenswert! ich freu mi scho uf s nächste mal.

merci beacoup. it was so nice. ci vediamo bis zur nächste reis. the flight was a joy. grazie. a voi!


meimei5Stacks - 25-1-2012 um 12:50

Imenä Jahr lisi de aues ;)

fallen angel - 26-1-2012 um 12:34

i has iz us luter neugier scho mal gläse... u bi scho am überlege, mit wäm i äch s tic vo zug söll tuusche...

funny_girl - 30-1-2012 um 13:53

d'Versuechig isch scho cheibe gross, das z'lese, aber de Monet magi jetzt au no gwarte, bis is selber gsene...

fallen angel - 2-2-2012 um 09:49

heheh... be mir isch no gäbig... ha scho ummi alls vergässe. das isch de vorteil vomene löcherbecki als hirni... ;)

Dalio - 4-2-2012 um 01:04

So, ich mäld mich do au mol wieder. Hu du, no ei Monet, denn ischs so wit. BAAASEL.

Ich lies es jetzt extra nid, will ich mir d Überraschig nid will näh, aber sobald ichs gseh ha, wird ich das nochehole ;)

Première GATE 10 10.02.2012 Casa di Volco

Cheyenne - 11-2-2012 um 14:17

also vorwäg, es wärde keini inhaltliche Details verrote, numme überwältigendi Begeisterig in d Wält gschraue.

Wuhuuuuuuuuuuuu. ÄÄÄÄÄÄÄÄÄÄÄÄÄÄÄÄÄÄÄÄÄÄÄÄÄNDLICH, ändlich ischs sowyt gsi. Geschter simmer uf Züri zitteret. Ich in d Züri-City? Alli Alarm-Glocke hän glüchtet. Jo richtig, uf Züri… und zwar wär hätts dänkt, ganz ohni Stau irgendwenn am Nomi. Zerscht in dr Jules Verne Bar hoch über Züri eins go zieh und denn fein go Filet uf em heisse Stei schnabuliere. Wär scho jetzt eigentlich e Reis für sich wärt gsi.

Ei Highlight reiht sich am andere, aber was denn no cho isch. Das chönnet Dir Euch nid in Eurne kühnste Träum überhaupt je emol vorstelle. Langersehnt, d Spannig isch nid zum ushalte gsi. Zwei Nächt vorhär natürlich nüt chönne penne, ächt he. Ooooohm ganz ruhig, chum obe aaaabe. Schön isch es au wieder gsi, nach so langer Zyt bekannti DivertiMento-Gsichter rund um d Show z gseh. Wie zu alte Zyte. Herrrrrrlich!!!

I möcht an dere Stell nid inhaltlich in Details go, will wenn meh dört im Casa di Volco sitzt und gar nid weiss, was do uf eim zuechunt, isch es doch am Allerschönschte. Dr erscht Ydruck zellt für mi, isch scho immer eso gsi. Und drum hani mi sälber eifach au welle überrasche loh und nüt verrote loh. Jo und i gibs zue, soviel Details hani mir gar nid chönne merke, bi eifach total gflashed gsi. Salzheimer-Krankheit weisch…

So, mir hän uns uf alles gfasst gmacht. Und denn für mi die erscht grossi positivi Überraschig. D DivertiMentos sin no gar noni uf dr Bühni gsi und das Volkshuus isch scho fascht usgraschtet vor Begeisterig. Ha ächt gmeint, das wird schwierig hüt. Medie, Krawatteschlüch und s Farbfärnseh. Nüt vo all däm isch z gspüre gsi. Es hän sich alli drüber scho mol überschwenglich gfreut, dass sie ändlich wieder die Brätter stürme. Die Bude het grockt vo dr erschte Sekunde a. Niiiiiice!


Soviel sig Euch verrote, meh isch zum Lache zum Gniesse und zum Stune nümm us cho . Also was do für e Comedy-Erläbnis mit Musical Elemänt uf d Bei gstellt worde isch, isch anbäliiiiiväbäl. Zweimann-Show, aber meh het s Gfühl gha, es seig e riese Cast do uf dr Bühni. Eimol meh hän sie sich sälber bi wyyyytem übertroffe. Überwältigendi Ydrück hani mit hei gno. Es goht in allne Belange dur und dur. Meh chas nid beschriebe, es glaubts eim niemer. Meh MUESS es eifach gseh ha.

Meh taucht ii in d Wält vo Comedy à la DivertiMento-Carte, serviert uf em Silbertablett, und wird uf e Reis mitgno mit grandiose Entertainer. Ihres multi-künstlerischi und musikalischi Talänt wird vo de DivertiMentos in dere Show voll und ganz usgläbt und uskostet. Und dasmol dörf meh guet und gärn sogar vo Illusioniste rede. Will d Vorstelligskraft wird uf ganz spezielli Art und Wiis uf d Spitze triebe, so als wär meh zmitzt din anstatt nur drbi. D Nöchi zum Publikum isch also nid numme für die in dr erschte Reihe hutnoch z gspüre, sondern im ganze Saal. Sie sprüeh vor Energie und risse s Publikum mit Komik und fätze Songs mit, dass teilwiis ungloge Party-Stimmig ufcho isch, wie amene Oktober-Fest uf dr Wies’n. Schliesslich isch es d Jubiläums-Show und wird abgfyyrt, dass also die Bude bis in d Grundmuure grockt worde isch. Sensationeeeeeeell.

I bi total gflashed gsi und muess das überwältigendi Erläbnis zerscht emol verarbeite. Uf jede Fall weissi scho jetzt, sie hän bereits sämtlichi Rekörd in dr Schwiiz broche, aber sie hän d Mässlatte für ihri Mitstritter ändgültig unerreichbar hoch gsteckt. Mir wüsse alli, wie Plan B agfange het und wie sie sich Show für Show gsteigeret hän. Hmmm, sie wärde s Unmöglichi möglich mache. I bi fest drvo überzügt.

Merci viel viel Mol liebi DivertiMentos. Für mi sin Dir eh scho längscht unerreichbar, und bi GATE 10 cha sich jede drvo sälber überzüge. Zweimol e ellelangi Standing Ovation in Züri, also wenn das kei superguets Omen isch, weissi also au nümme.

meimei5Stacks - 11-2-2012 um 16:22

Uii nei, diä Versuächig isch so germassä gross das z'läsä...
Aber ha da ä Technik, eifach gar nid härä luägä, nid ämau ei Blick druf wärfä..
Mä seit ja: Augen zu und Durch! ..Auso ig probiäres uf jedä Fall ;)
Aber wird de doch schwär, das ersch im Dezämber ds chönä läsä, ob ig das schaffä?

Cheyenne - 11-2-2012 um 17:26

meimei, kcheine Panikch stoht eigentlich nüt din, wo meh nid scho in dr Präss vernoh het;)

meimei5Stacks - 11-2-2012 um 18:21

Ja wenn das so isch..

Yippie!Freuä mi immer meh druf, und so serägi Brichtä maches no spannender!

Döönt ja mau bombastisch, das ganzä und vor auem isches mega schön gschribä vo dir!

Dalio - 11-2-2012 um 18:54

Stimmt, d Versuechig isch eeeeextrem :)

De mit em Auge zue und dure isch e gueti idee ;)

Dalio - 12-2-2012 um 22:45

@Cheyenne: OMG! Jetzt han ichs mr doch duregläse. Nachdem ich mindeschtens 5 Mol ha müese läse, dass nüt inhaltlichs debi isch und jetzt? ...

Jetzt bin ich no gspannter, grad WILL nüt Inhaltlichs debi gsi isch. Kei einzige Satz wist uf öppis hi.

Uh du :smilegrin: Vor Ufregig han ich sogar vergässe, wie die Smileysite heisst :smilegrin: Wie isch das scho wieder gsi?

Cheyenne: Ächt e Komplimänt. Du schaffschs, e ellelange Bricht z schribe, wo dr einzig Inhalt gsi isch, wie tolls gsi isch. Und me will immer witerläse. Ächt Rispäkt :thumbup:

Cheyenne - 13-2-2012 um 06:45

Hihi, Dalio, das isch volli Absicht gsi. :lol: Ich ha Euch nid welle d Vorfreud raube. D Vorfreud isch doch immer die schönschti Freud.

Das hesch jetz mega lieb gschriebe. Merci vielmol.

Dalio - 13-2-2012 um 13:22

@Cheyenne: Wenn ich jo so lang nüm do gsi bi, mues ich das doch wieder chli guet mache ;)

Aber wie heisst jetzt die Smileysite? Has ächt voll vergässe :lol:

Dalio - 13-2-2012 um 14:10

Isch doch nid nötig. S isch mr wieder igfalle


funny_girl - 13-2-2012 um 19:17

I het de Bricht vo de Cheyenne nöd sölle lese... Will jetzt hani unerträglichi Vorfreud und es goht no genau 2 Wuche und 5 Täg. I weiss grad echt nöd, wieni das söll durestoh...

Dalio - 13-2-2012 um 19:21

@funny_girl: Ich weiss, was du meinsch :) Bi mir ischs jetzt no chli weniger als en Monet. Aber stell dr mol vor, du müesstisch irgendwie bis zum Novämber warte :crazy::crazy::crazy: DAS isch denn dr Horror :crazy:

funny_girl - 13-2-2012 um 20:04

i glaub, i wür mi vorsorglich mol id Klappsi iiliefere lo, weni no bis November mössti warte :lol:

Jo nu, eigentlich müssti jo de Lehrer danke, dass mi wenigschtens mit Prüefige und Huusufgobe ablenked :)

meimei5Stacks - 13-2-2012 um 20:18

Ah, wär kennt ä guäti Psychiatrie?

*hust* bis Dezämber..
Oder nämemer doch d'Rubrik Winterschlaf..?

Dalio - 17-2-2012 um 21:07

Wohl eher Summerschlof. Im Winter heissts denn WACH sii :lol:

meimei5Stacks - 17-2-2012 um 23:28

Uhuu stimmt, wäri de nid so guät, wenn ig dr Dezämber würdi verschlafä..

Dalio - 18-2-2012 um 11:51

DAS wär ächt dr Horror. Denn wartisch e Joor und denn verschlofsch

Mann, die drei Wuche jetzt chöme mr au wie dr Horror vor. Denn han ich au no Ferie. Das heisst kei Ufzgi wo mich ablänke

Flughafen St. Gallen - Gate 10 am 3.3.2012 – letzter Aufruf

funny_girl - 4-3-2012 um 10:54

Halt, was letzter Aufruf, das isch jo scho de Schluss…

Aso, fangi mol vo vorne ah. (wer no absolut gar nüt vom Programm will wüsse, besser nöd lese! Aber bsunders detailriich wird de Bricht sowieso nöd werde, wer also en chliine Vorgschmack wet, chan en glaub getroscht lese, ohni dass di ganz Spannig weg isch Ganz sicher bini aber au nöd öb überall d’Reihefolg würklich stimmt…

Akunft "Flughafe" St. Galle im Parkhuus: Chum zum Auto vo de Kollegin us, langsam Richtig Usgang glaufe, was ghör ich? „I’m Sorry“ vo Tempesta dröhnt us de Luutsprecher. E schiiss Freud hani gha, ehrlich. Natürlich sofort de Kollegin erklärt, wieso dass ich denn so grinse.

Denn simmer i de Tonhalle ineghocket (e mega schöni Halle übrigens) und s’Programm isch Punkt 8i losgange. Aso die Videowand het mir vo de erste Sekunde a mega gfalle. D’Sequenze sind echt super.

Zersch chömed emol de Jonny und de Manu am Flughafe a und hend scho die erschti Meinigsverschiedeheit: Wo here goht’s denn jetzt eigentlich id Jubiläumsferie? Eigentlich nöd so wichtig, s’Flugzüg het sowieso 90 Minute Verspötig. Gnueg Ziit also, de Ursula am Uskunftsschalter zuezluege, wie sie mit Sprochschwierigkeite kämpft, meh oder weniger berühemte Musiker zuez’lose, wo am Flughafe mit teilwiis sehr eigewillige Kompositione wönd ihres Geld verdiene. Au gnueg Ziit für die beide, zum en Filmpriis überzcho für de Film „CSI Züri Oberland“. Überreicht isch de Priis vom Daniel worde, er het de glamurösi Bruef Sanitär.

Noch de Pause isch es sofort wieder Schlag uf Schlag wiiter gange. Jo, Schlag triffts guet. E Schlagernummere isch nämli au debi gsi. Aber au mit ere Talentshow, emene echt spektakuläre Uftritt vom JK. De Gian-Franco het sin neue Arbetsplatz zeiget und de Mäge isch au nüme i de Höll. Schlussendlich isch sogar no Ziit gsi für e Musical-Nummere. Debi chani eifach nomel betone, wie super dass d’Videowand iigsetzt worde isch.

Und denn isch ebe de bereits erwähnti letschti Ufruef cho. Und das Hammer-Programm so guet wie fertig gsi. Meh wöt i do bewusst nöd verrote, das gsehnder jo denn selber. :)

Denn no gschnell go es Autogramm hole mit de Kollegin und denn isch es scho wieder hei zue gange. De Obig wird mer definitiv no lang in Erinnerig bliibe.



Dalio - 4-3-2012 um 12:51

@funny_girl: Dörf me din Bricht gfahrlos läse oder söll ich bis nöchscht wuche warte, wenn ichs au gseh ha?

funny_girl - 4-3-2012 um 13:48

Das isch d'Iileitig vom Bricht:


Zitat

Aso, fangi mol vo vorne ah. (wer no absolut gar nüt vom Programm will wüsse, besser nöd lese! Aber bsunders detailriich wird de Bricht sowieso nöd werde, wer also en chliine Vorgschmack wet, chan en glaub getroscht lese, ohni dass di ganz Spannig weg isch Ganz sicher bini aber au nöd öb überall d’Reihefolg würklich stimmt…


muesch selber entscheide. I han en eigentlich bewusst relativ offe lo...

Dalio - 4-3-2012 um 15:10

Ich ha mich nid mol getraut, dr erschti Satz z läse :lol::lol:

Dalio - 9-3-2012 um 16:16

Omg, ich bi meeeeega höllisch ufgregt

Sicher toll wirs bim Jo Mann JK

Drucket mir und Diverteimento d Düüme, dass es hüt zobe keini grosse Panne git

PAAAARTY

meimei5Stacks - 10-3-2012 um 12:43

..Und?

Kei Pannä gäh? ;)

Sekiuriti - 25-4-2012 um 17:49

Zitat Ursprnglich verfasst von funny_girl  
Aso bi Gate 10 zeigts bi mir au keis Briefli a, das liit aber glaub dra, dass det niemert en Showbricht vom 19. inegschriebe het. ;)


Walà, Briefli :smilegrin:
(Geit ou ohni Showbricht :smilegrin::smilegrin: )

funny_girl - 25-4-2012 um 20:04

du bisss so fuul! (eigentlich nöd nume du....) :(

Aso chunt eigentlich irgendwenn mol no öpis oder isch's für alli so peinlich gsi, dass sich niemert getraut, was inezschriibe?! :lol:

Cheyenne - 25-4-2012 um 21:00

S Sekiuriti isch e richtigs Fön Kuki hüt. :lol:

Also wie gseit wött nid meh verrote, wie scho im 1. Bricht vorhande isch. Es isch ei Nummere gstriche drfür e anderi din. Und jetzt weisch glich nid meh. :lol:

Und s Gési het mir e Ticket in dr 2. Reihe aadreit, drfür het sie mis becho. Das isch dr volli Bschiss gsi. Nid ei Stuehl vor mir. Fascht uf dr Bühni obe ghockt bini. Meh müen Dir gar nid wüsse. :rolleyes: Also wenni mis bhalte hätt, wärs ungefähr uf s Glichi usecho. :dork:

D Show isch natürlich dr Oberhammer gsi und sie wird immer no besser. I weiss nid wie die das mache, aber es isch eso.

gesi - 25-4-2012 um 21:26

u i wetti no ergänze...

IG ha d Chey einisch ganz lut ghöre Schreie.... auso ig ha bis uf ei gfährlechi u ei biz füechti Situaiton definitiv der besser Platz gha... ;)))))))))))))))

Cheyenne - 25-4-2012 um 21:28

Das isch aber schön für Di. :lol::lol::lol: Fascht e Härzbaracke hani gha. Müend chli Rucksicht näh uf mis Alter. Aber neeeeeeei!!! :lol:

gesi - 25-4-2012 um 21:30

u ig de???!!!???? dänksch nüt böses u de chunnt öbbis über d Bühni cho z flüge... ungewollt... ;O))))))))

du u dis Auter... ;O)))))) haub schiintod....

Cheyenne - 25-4-2012 um 21:31

Ouh hani gar nid mitbecho, was denn?

Cheyenne - 25-4-2012 um 21:34

Guet, ich cha ame dr Uswiis dehei loh... schon mal guuuut, Gäll Gési. Vergiss isch en eifach nie meh :lol::lol::lol::lol::lol:

gesi - 25-4-2012 um 21:36

S Gitarreschämmeli het churz vor Bühnerand bir Sekiuriti u mir gstoppet...

Ja, du Itritt isch ab 6 Jahr, da muess au ig nid zeige... :lol::lol::lol::lol::lol::lol:

funny_girl - 25-4-2012 um 21:38

Guet, d'Cheyenne het mini Erwartige ufs vollschte erfüllt. I ha nämli bim aafange stichle so denkt: "5 Zeile wiireds scho herebringe" Und de Bricht vo de Cheyenne wird uf mim Laptop i genau 5 Zeile aazeiget. :lol::lol::lol:

Cheyenne - 25-4-2012 um 21:38

Jo meh weiss es ame nie. :lol::lol::lol:

Cheyenne - 25-4-2012 um 21:48

Jetz hani gmeint, heig gar nüt gschriebe und scho... so schnäll chame Lüt glücklich mache. Nice to know. :lol::lol::lol:

Sekiuriti - 27-4-2012 um 18:21

dr Luft Chocher het es Hirni wienes Sieb, wie söu me de da e Showbricht schriibe? :( Weiss nur dass alli dr Flug verpasst hei uf Ibizholm oder so.

gesi - 28-4-2012 um 06:28

So miner Liebe... I gange jez hüt mau go luege öb der Züri-Chlote es Gate 10 het.... u wenn ja gibimer schuuuuuuuuuuuuuuuuuuurig Müei der Flug nid z verpasse... und ja, ig weiss definitiv woni häreflüge....

Bis inere Wuche oder eso!!!!

Zägg und wäg bini!!!!!

Cheyenne - 29-4-2012 um 07:56

Schöni Ferie bi PLUS 30 Grad. :cool: Happy Schwitz :)

fallen angel - 2-5-2012 um 12:27

Zitat Ursprnglich verfasst von Sekiuriti  
Zitat Ursprnglich verfasst von funny_girl  
Aso bi Gate 10 zeigts bi mir au keis Briefli a, das liit aber glaub dra, dass det niemert en Showbricht vom 19. inegschriebe het. ;)


Walà, Briefli :smilegrin:
(Geit ou ohni Showbricht :smilegrin::smilegrin: )



Zitat

Aso chunt eigentlich irgendwenn mol no öpis oder isch's für alli so peinlich gsi, dass sich niemert getraut, was inezschriibe?!



aaauso... mi showbricht befindet sech sit em 20.4. ufm pörsonel compiuter... är het sech numeno ni säuber veröffentlicht... weni de mal luscht ha, ne izschalte, dueni ne de poste... :)

fallen angel - 11-5-2012 um 05:40

International Airport Zug, Donnschtig, 19. April 2012

~areis u vor der show~

jo, d outobahne... vielfach überfüllt u das geng zur gliiche zyt... naja... i bi mit öpe 20 minute verspätig z zug acho. es si scho alli am reservierte tisch ghocket. walà, iz chas losga.
d spiischarte chunt pronto a tisch, was me vom täller ni cha behoupte. mir si denn öpe am halbi achti zum restaurant use gange.
churz vor de show träffe mer denn s sekiuriti u s tanscha ir erste reihe, so wi sech das für nes hardcorie ghört. :)


~d show~

kommt ein vöglein... ääääh... ein manu geflogen... :)
walà... es isch so kuul gsi!!! gate 10 isch de hammer!!!
es chöme ganz viel figure vor, womer scho kenne.
da isch zum bispiel d ursula... si büglet jetz am infodesk. de fremdsprache isch si nid so mächtig. derfür het si jetz e verehrer. ;)
de gianfranco isch bem sicherheitscheck. det trifft är de wugudugu und de dave. der eint verschwindet gad ummi u der ander wot sech la abtaschte. :lol:
denn isch das schiisgrät... achtung... "capuuutt"... :smilegrin:
de technisch dienscht mues cho. auso, chunt er... de mäge. neeei, es het ne ni putzt. fählinformation.
de wird de filmpriis verleit. zur uswahl stö... "bunsenbrenner joe 3", "CSI züri oberland" u (de titel chunt mer nüm i sinn... so öpis wi "med care" oder so ähnlech). denn isches sowit... de umschlag wird ufda... änd de winner is... jonathan und manu... wer häts gedacht?! :lol:

ide pouse wärde uf de liinwand bilder vom 10 jährige schaffe zeigt. :)

denn geits witer miteme flamenco. super tanzt jungs!!! :smilegrin:
denn chunt d taläntshow.
vier tenör wo alli mini änteli uf italiänisch vortrage. so kuul!!!
de heimer no e buuchredner. dä bringt de bär knut zum rede. u was die alles z verzelle hei. chame fasch ni gloube... :)
eine stellt sech ni vor. mues er u chaner ou ni. woner d decki wägnimmt isch stimmig ir buude. wär isches äch? jooo, natürli de JK vo SB westside!!! :) är zeigt sis talänt... zoubere. isch e wahri party!!!

walà... u meh weisi irgendwie nüm. fählt sicher no d helfti. :lol:


~nach de show~

...simer no chli blibe u hei no mit de divis gredet. denn simer irgendeis i all richtige verschwunde... :)

tolle abe gsi!!! :smilegrin:

Sekiuriti - 27-5-2012 um 16:23

So, i gloub i muess mau nocheluege ob i eigetlech gägä Wasserschade versicheret bi … Die Jazz-Musiker si gemeingefährlich!! Die müesste nidmau öpis mache, nur dert hocke, das längt scho. Im Prinzip längts scho nume we dr "Thomas" ufd Bühni chunnt - da hets mi scho fasch verbrätscht und när hets nur no gschpüderlet us de Ouge ... Dä isch eifach z'vüu

Cheyenne - 27-5-2012 um 17:01

Ha gmeint müess Di go zämme bäsele:-))) Sie het sich dr Räscht vo dr Show fascht nümme chönne erhole. :lol::lol::lol: Wältklass die beide Jazz-Musiker. Mi hets susch no fascht vom Stuehl bäst, wäge däm huere Böckli wieder. Fascht e Härzbaracke iigfahre. :lol::lol::lol: Es isch wieder z hoch gsi. :lol:

Sekiuriti - 27-5-2012 um 17:11

jo we da mau i Lachflash chunnsch fingsch dr Usgang chuum meh! ...

Ou jo, ha fasch müesse GABI-Isatz schwinge, ha gmeint gheisch vom Stüehli :lol: . Aber wägem lache hani das mit de Froge nid so rächt ufd Reihe brocht :lol:


gesi - 3-6-2012 um 11:20

Uiuiuiuiui..... geschter z INDERlake.... der Hammer gsi.....

Der nätti Kandidat us der Reihe eis het Arben gheisse.... es gfundnigs Frässe für die Herre.... ;O))))))

Und der Mister vo S.B. het sech ufgregt übere Typ wonim vor 3. Reihe mit der Pfunzle zmitts i Gring bländet het... herrlech.... ;O)))))

Aber no der grösser Brüller isch dä Typ 2 Reihe vor üs gsi... het eso geil glachet, das üse Egge d Höufti uf der Bühni gar nümmi mitbecho het...

Sunneschii - 6-7-2012 um 19:10

Ich tuen ez do also mol kei Bricht läse, i wetts denn falls is au mol no chönt go luege mit eigne Auge gseh ;)

Bätet er chlii mit mer, dass de Vorverchauf ned wider zmizt amre Friitig Nomitag startet??;) denn hani nemlii überhaubt keii Chance ufes Ticket und gah scho wider (wie immer :sniffle: ) leer uus :( I ide Schuel, mini Schwöster ide Schuel und mini Eltere am schaffe, e blööderi Ziit as letst Johr hend si sich au ned ussueche chöne. I getrau mi nemli ned, eifach zuefällig chrank z sii [:smilegrin:], wells die andere sofort usebechoo würdet, dassi stattesse ide Post Schlange stoh --> niicht guuut... Düend chlii Duume drucke für mii (und all die andere lütliis wo ide schuel hocked...) Isch guet?? :cool:

meimei5Stacks - 6-7-2012 um 23:10

*Dume drückä* ;)

Chasch auso beruhigt si, ig ha z'neuä Programm bis iz o no nid dörfä i Gnuss nä.. :smilegrin:

Uns bi mir isches o so gsi, dass ig denn Schuel ha ka..
Aber äbä, irgendwiä hani mi chönä düräsetzä und dr Zuäfau hets wöuä, dass ig no a 4 Ticks für das Jahr bi cho! :)

Hoffe, dass es für di im 13ni o klappet!

Sunneschii - 7-7-2012 um 18:18

Uh, chönd die sich denn ned überlegge, dass es au Schüeler under erne Fääns het? :) Also, i denk, mer wartet jetz das mol ab und er ghöret wider vo mer, wenni de was z meckere ha ;)
:lol: Es wür für mi en RIIIIIIEEESE Traum in Erfüllig go, wenni die mol laiif gseh chönd :lol:

funny_girl - 7-7-2012 um 18:39

Zitat Ursprnglich verfasst von Sunneschii  


Bätet er chlii mit mer, dass de Vorverchauf ned wider zmizt amre Friitig Nomitag startet??;) denn hani nemlii überhaubt keii Chance ufes Ticket und gah scho wider (wie immer :sniffle: ) leer uus :( I ide Schuel, mini Schwöster ide Schuel und mini Eltere am schaffe, e blööderi Ziit as letst Johr hend si sich au ned ussueche chöne. I getrau mi nemli ned, eifach zuefällig chrank z sii [:smilegrin:], wells die andere sofort usebechoo würdet, dassi stattesse ide Post Schlange stoh --> niicht guuut... Düend chlii Duume drucke für mii (und all die andere lütliis wo ide schuel hocked...) Isch guet?? :cool:


De erscht Vorverchauf für Gate 10 isch im Fall am Donnschtig gsi, de zweit am Mittwoch (während de St. Galler Schuelferie)
Aber wennd du natürlich amel erscht am Friitig hesch wölle go Ticket chaufe, isch mer scho klar, wieso dass du kei verwütscht hesch. :lol:


Sunneschii - 7-7-2012 um 18:49

Ou wie piinlich... HAHAHAHAA scheisseee... i ha zu dere Ziit ebe nur sonen komische abstürzende PC zur Verfüegig gha... uuu Mist, denn hani det e falschii Informatioon bechooo :lol: Gott isch da piiinlich!! vergessed alles, i bi gad am im Bode versinke :lol:

gesi - 7-7-2012 um 22:36

macht nüt we im Bode versinksch... irgendwenn chunnsch eh uf der angere Site wider use...;);););)

Sunneschii - 8-7-2012 um 13:54

:lol::dork::thumbup:

fallen angel - 10-7-2012 um 15:06

aso, i ga mini tix eh nüm online go poschte... rege mi amigs z fescht uf, wes mal ummi nid isch gange. iii ga iz amigs ane vorverchoufsstell. ;)

Sunneschii - 10-7-2012 um 16:06

Funnefii du chaf daaf! If f einzig wod chaaf! (oder ebe au ned :) )
Jajaa i seg eu denn, wenns denn so wiit isch, wie's gloffe isch!

funny_girl - 10-7-2012 um 16:51

Aso i gange wieder am gliiche Ort go chaufe woni s'letscht Mol gkauft ha. I hoffe eifach, dass wieder so en nette Lehrling det isch, woni dörf e Viertelstund versuume.

fallen angel - 3-10-2012 um 11:41

froueee??? wo si de d tourbrichte häre verschwundeee??? :)

meimei5Stacks - 3-10-2012 um 12:45

So baud ig derbi bi gsi, mäud ig mi de oh :smilegrin:

Sekiuriti - 3-10-2012 um 17:46

... auso ig finges um ehrlech z'si henne schwierig bi däm Programm e Bricht z'schriibe, weiss nid wora dass es ligt. Wahrschinlech ou da dra dass i sit Plan B wieder es Jahr älter bi und nach 5 Minute aues scho wieder vergässä ha ... ;)

Cheyenne - 3-10-2012 um 17:51

Cha doch nid alles verrote, häns jo noni alli gseh. ;)

funny_girl - 5-10-2012 um 18:18

Aso i bi unschuldig, i ha mini Husufgobe gmacht... :lol:
Und bis zum nöchschte gohts bi mir halt immer no meh als en Monet...

Sekiuriti - 15-10-2012 um 17:13

... auso i weiss nur was gfäut het ... dr Dave isch nüm vorcho und irgend e Videosequänz (wo si sech d'Zyt mit diversem vertriibe) isch ou nüm drinn, oder hani die verschlofe?

gesi - 15-10-2012 um 20:18

i säge ders ändi johr... ;)))))9

Sekiuriti - 2-12-2012 um 09:27

Nei dä Videoteil woni gmeint ha sig nüm drinn isch also no drinn, dä chunnt scho zimli am Afang. Aber dr Dave hei si definitiv kickt ...

Hey aber heit Dir scho mau eini im Publikum gha wo ständig aues vorgseit het?? Läck das isch de müehsam! Die isch schinbar irgendwo hinger mir ghocket und es het gnääääääärvt ohni Ändi!!! :grind: I has ja ou nid s'erschte mau gseh aber das Vorschnurrä fingi ächt zum chotze (und die het de nidmau gchüschelet, auso mindeschtens zwöi drü Reihe vore und hinge hei das sicher ghört!) Bis jetz isch das auso no nie vorcho.

d'Show isch super gsi. Dä arm Manu, das chranksi wird vou usgnützt vom Jonny ... guet, wo dr Jonny sis Gstältli denn het anne gha ischs angersume gsi ... Das isch de wou ou d'Retourkütsch ;) Leider hets kei Standing Ovation gä, aber das het sech vom Publikum här irgendwie scho die ganz Show abzeichnet hets mi dünkt (und gäng alei ufstoh isch ou chli piinlech).

funny_girl - 2-12-2012 um 10:19

Zitat Ursprnglich verfasst von Sekiuriti  


Hey aber heit Dir scho mau eini im Publikum gha wo ständig aues vorgseit het?? Läck das isch de müehsam! Die isch schinbar irgendwo hinger mir ghocket und es het gnääääääärvt ohni Ändi!!! :grind: I has ja ou nid s'erschte mau gseh aber das Vorschnurrä fingi ächt zum chotze (und die het de nidmau gchüschelet, auso mindeschtens zwöi drü Reihe vore und hinge hei das sicher ghört!) Bis jetz isch das auso no nie vorcho.



das hani bisher nume vom Kino kennt. Vo so Lüüt, wo de Film schomol gseh hend.... Dasch würklich nöd luschtig....

Sekiuriti - 2-12-2012 um 13:04

Nei es isch mer ächt mega ufe Geischt gange. I has säuber ja ou kennt, aber i närvä mi gloub amigs für die angere, wüu angeri hei ja das hunderpro ou ghört und hei s'Programm s'erscht mau gseh geschter. Und so Vorschnurrine vermassles när eifach. Isch jedefaus mini Meinig.

Cheyenne - 2-12-2012 um 17:33

Ouuuh, do wäri glaub au nid ufs Mool ghockt. Uuuuh Duuuu. :no:

Sekiuriti - 2-12-2012 um 17:43

Uuuuh Duuuu. Weni würd rauche wäri grad eis go rauche :grind:

Cheyenne - 2-12-2012 um 18:39

Chriesi rauche wär au nümm dine gläge bi mir.

funny_girl - 2-12-2012 um 19:46

I het mi glaub zimli schnell umkehrt und die ganz bös aaglueget. Und wenn das nüt gnützt het: Smilies
:lol:

I bi jo suscht nöd so, aber i het im Kino würklich mol fascht sonere Person die leer Popcornschachtle an Kopf grüert....

Sekiuriti - 2-12-2012 um 19:58

@Chey: wär nume no schlegle drinn glägä? ;)

ja i ha mi halt so still und liislig innerlech jedesmau ufgregt we vo dert hinge wieder öpis ghört hesch

Cheyenne - 2-12-2012 um 21:39

Nei, zum schlegle bini z wehliidig und isch no nie mi Stil gsi. Aber mini Schnurre isch Waffe gnueg :lol:

Flughafe St. Galle 1. Februar 2013

funny_girl - 2-2-2013 um 17:35

Eigentlich hani mir vor gno, kein Bricht z'schriibe. Aber noch dem Obig geschter chani fasch nöd andersch. Leider hani scho viel z'viel wieder vergesse.

Noch fascht 11 Mönet siit em letschte Mol hani mi natürlich riesig gfreut, d'Divertimentos endlich wieder live z'gseh. Mini Schwöschter au. Sie het Gate 10 nonig gseh gha.
I fang jetzt mol mit em einzige Negative vo dem Obig ah:
Wie das so isch, me cha sich d'Sitznochbere nöd ussueche. Nebet mir isch en ca. 60-Jährige Herr ghocket, wo mit 2 Bekannte det gsi isch und druf bestande het, nebet mir dörfe z'hocke. Leider het irgendwie au immer de Zwang gha, müesse öpis witzigs säge. Leider isch s'meischte nöd so witzig gsi. Öbs dra liit, dass er definitiv nöd nume Mineralwasser gha het, wöt ich nöd beurteile. Hauptsach isch während de Show Rueh gsi.

Am 8i isch es au scho los gange. S'Publikum hend die zwei Divertimentos sofort uf ihrere Siite gha. Me het g'merkt, dass sie erscht grad mit de Tour 2013 aagfange hend und dass es em Manu wieder prächtig goht. E wahri Freud gsi, ihne zuezluege.

Erwähnenswert isch sicher d'Filmpriisverleihig. Mit em Filmpriisverleiher hends es damol meh als perfekt troffe: Ralph Egger us Eggersriet (das elei isch jo scho luschtig :) ), vo Bruef Tierarzt. Aso do dra hend die zwei sichtlich Freud gha. S'Publikum a dem wos drus gmacht hend. E super Steilvorlag bi dene tierische Figure. Leider hani au do scho s'meischt wieder vergesse.

Wie das so isch, de Obig isch natürlich viel z'schnell wieder z'End gange. Die letscht Glegeheit für de Manu und de Jonny no es paar Tierarztsprüch usezhaue. I weiss nur no de so ungefähr: Jonny: "Ralph, was mi jetzt aber ehrlich würd interessiere, hesch du schomol de ganz Arm tüüf inere Chue ine gha?" Manu: "Nei, aber sicher imene Meerschwiindli" :lol:

Und am Schluss sind d'Divertimentos für de Obig gebührend mit ere Standing Ovation verabschiedet worde.

Nochher isch es scho fasch halbi 11i gsi, mir sind no aagstande wege Autogramm und i ha mir endlich es Diverti-Memo chöne chaufe.

Abschlüssend bliibt nur no z'säge:

Wie s'Programm bis jetzt wiiter entwicklet het, isch grandios.

und

danke Manu und Jonny für de superluschtig Obig! Bis zum nöchschte Mol.

fallen angel - 10-2-2013 um 14:09

International Airport Lenk, Do, 07.02.2013


boah... chürzischti aareis... ehm... EVER!!! :bigsmile: e churzi haubstund... vilech paar minute meh, wägs ja unbedingt het müesse schneie... :mad:


walà...
achti... eeehm... wär isch no ni am platz? chöimer afaaa???
ca. sibe minute speter denn d begrüessig düre mischter zält direktor... dingens... zügs...
uuund... info, dass uf der simmetalstrass irgendwo e boum umgstürzt isch. drum de speter afang u di viele lääre plätz.
guet, es het denn gliich agfange.
de umgsürzt boum het wine rote fade dür z programm gfüehrt. :lol:
d laudatore für d filmpriisverleiig si super gsi. steffi und markus us steffisburg. de markus isch vo bruef kunststofftechnolog... was für zimli viel stimmig gsorgt het. wäg genau dä bruef het d divis zu zuesätlichem text inspiriert. i ga iz da nid is detail... läse gloubs ou chind mit... :smilegrin:
bem metalldetektor, wo de gianfranco und de mäge uf de bühne stöh... fragt de mäge de gianfranco, ober äch e leitere hät... ehm... nei, ich gseh... *gröööhl* (de "dütsch" stellt e leitere use) di zwe gö schier d schiissi ab... genau wi z publikum. de gianfranco versorgt se ummi u meint zum mäge... neeeeei, ich ha ke leitere gseh!!! :)
der absolut schlusssong... aso, besser gseit churz dervor. luter luschtegi sache heisi z berede, abr nume öpis isch mer würklech im sinn blibe... manu zum jonny... di würdet dich glaubs gärn nomal im bärekostüm gseh... (kanton bern... tscheggsch en??? :smilegrin: ) s publikum gröhlet u chlatscht... und de "dütsch" bringt em jonny s kostüm. :lol: uiii, das heter ihm gad ummi nachegrüert.


so isch dä abe doch zimli schnäll fertig gsi. abr...

bi no es autogramm go hole.
jonny: hoi... *ufguck*... eeeh HALLOOO!!! wi geits?
ig: joa, geit guet. sälber?
jonny: guet, merci. *sitehieb manu*
manu: hallo!!!
jonny: chürzeri haar... bisch extra da ufe cho???
ig: jo, i wohne da... aso z "pünktlipünktlipünktli" (i däm dörfli woni halt wohne :smilegrin: )
jonny: simer det verbi gfahre???
ig: *grins*
dezue hei mer di zwöi no e autogrammcharte unterschribe. (multitasking... ;) ) und gloubet jaaah nid, das det e name druf steit... d widmig lutet: "grüess id heimat" :lol:

dä abe isch wük sooo de hammer gsi!!! super gmacht, jungs!!! freu mi scho ufnes nächschts mal!!! :)

International Airport Wil

Sunneschii - 17-2-2013 um 19:16

Soo, i has ez au gschafft. :D Endlich, noch Johre langem vo wiit her aschwärme hani die zwei au mol live gseh.

I glaub, allzu vill gits do ned z verzelle. Live sinds no tuusig mol besser as uf DVD. ;)

Mit de Kollegin hani no gwettet gha, ob s echt das mit de Lasagne und da mit em Vatikan bringed. Und prompt isch überall no en Siitehib gege de Papst, d Lasagne (de Coop chönds jo ned guet dur de Dreck zieh... hahaha) und gege die Dütsche(-bühnetechniker) cho.

Bim Autogramm geh hani den no es paar Wort chöne mit em Jonny wechsle, hahaha und au det hani mi nomol futschlache chöne :'D Nume scho dem sini Kommentär zu mim Name. Und womer uf mini Wett betreffend d Lasagne zspreche cho sind, het er luut uflache müese.

Nomol was lustigs: D Jungs hend jo immer so Paraderolle und -witz (Zägg do bini wieder, JK us SPWestside, GF us churwalda, Urfulaaaaaa usw...) ibaue gha, und so chlini Sprüch, womer nur druschunt, wemmer Divertimento fanatisch isch (also wie ich...). Und s geilste (sorry für da Wort) isch doch eifach gsi, dass nebed und hinder mer en huufe Lüt gsesse sind, wo a dem Obig wohrschinli s erst Mol vode Divertimentos ghört händ, und all die Witz ned begriffe hend. Ich bin mi do eifach am totlache gsi und sie lueged mi die lengst Ziit ganz begriffsstutzig ah.
Hahahaha die Gsichter :lol:

Alles in allem. En Traum isch in Erfüllig gange. Und sobald de neu Vorverchauf usechunt (goht wohrschinli no es ziitli) werdi wieder am astoh si.

meimei5Stacks - 21-2-2013 um 14:47

Zitat Ursprnglich verfasst von fallen angel  
wäg genau dä bruef het d divis zu zuesätlichem text inspiriert. i ga iz da nid is detail... läse gloubs ou chind mit... :smilegrin:


..a mir söus de nid lige! :bigsmile:

Danke für eui Brichtä... isch das d'Mehrzau..?
Dir wüsset ja, was ig meinä :)

funny_girl - 21-2-2013 um 21:14

Bitte, gern gscheh, Meimei. De Bricht i 3 Wuche chani mer spare, de chönd er jo denn selber luege, das isch eigentlich no ganz praktisch. :smilegrin:

Cheyenne - 23-2-2013 um 18:12

Do gits übrigens au no paar Fan-Reports z'läse :cool:

Also sie hän 5 Stärnli... vo 5! Eh klar, aber d Reports sin au ächt nätt z läse. :)

http://www.ticketcorner.ch/cabaret-divertimento-fanreports.h...

fallen angel - 24-2-2013 um 19:54

@meimei: nid uf di bezoge. gloubs dir döft me das bedänkelos verzelle. abr i ha z gfüehl, das no jüngeri mitläse... ;)

meimei5Stacks - 27-2-2013 um 22:04

Dann is ja gut :smilegrin:

Sekiuriti - 16-3-2013 um 11:37

Isch öper vo öich am Donnschtig im Volkshuus gsi?

funny_girl - 17-3-2013 um 21:00

Ich bi gsi am 14. . I de 1. Reihe hends scho die tollschte Brüef, wenn amel ich gange. S'letscht mol Tierarzt. Dasmol Polizischt us em Aargau :lol:

Wer isch eigentlich am Fritig gsi?

Aso i bi recht gspannt, weli Ufnahme dass nehmed...

Sekiuriti - 17-3-2013 um 21:08

also am Frittig isch dr Fipsy dert gsi :lol:

funny_girl - 17-3-2013 um 21:10

Aber nöd de vo Zug, oder?

Sekiuriti - 17-3-2013 um 21:14

ke Ahnig, äuä scho nid.

meimei5Stacks - 26-5-2013 um 12:17

Ig säge nume afangs eis zu Geschter.

''Egau was, är ziähts - Dr Urs Müller us Spiäz!''
Oder wie isch dä scho wider gange? :lol::lol::lol:

Sekiuriti - 26-5-2013 um 16:32

... leider kes Foti gmacht, aber d'Azeig ufem Büudschirm im Foyer im KK Thun isch ou zum schämä gsi ... Und das no zu allem härä nachdäm s'Buech usecho isch mit eme Kapitel über fauschi Näme.
"Gate 10. Mit: Jonny Fischer und Manuel Burkhalter" .....

Nic - 26-5-2013 um 20:09

Zitat Ursprnglich verfasst von Sekiuriti  
... leider kes Foti gmacht, aber d'Azeig ufem Büudschirm im Foyer im KK Thun isch ou zum schämä gsi ... Und das no zu allem härä nachdäm s'Buech usecho isch mit eme Kapitel über fauschi Näme.
"Gate 10. Mit: Jonny Fischer und Manuel Burkhalter" .....


ächt?!? piinlich... isch mer ned mol ufgfalle

funny_girl - 29-5-2013 um 19:11

Zitat Ursprnglich verfasst von Sekiuriti  
... leider kes Foti gmacht, aber d'Azeig ufem Büudschirm im Foyer im KK Thun isch ou zum schämä gsi ... Und das no zu allem härä nachdäm s'Buech usecho isch mit eme Kapitel über fauschi Näme.
"Gate 10. Mit: Jonny Fischer und Manuel Burkhalter" .....


Autsch....

funny_girl - 2-10-2013 um 18:22

Churzfassig vo geschter Obig, de Rescht hani scho wieder vergesse...

Geschter isch de JK recht i sim Element gsi.
Ihm sind Raps wie
"wer isch immer pleite, het kein Fränkler, de Josua, euse Bänkler"
will er het en neue Kolleg gfunde, de MC JK, alias "Josua Klauser"

Und de Gian Franco het vom Dominik e Leitere übercho. Het de Mäge irgendwie no zimli luschtig gfunde. :lol: Uf jede Fall het er zimli lang nüme gwüsst, wie jetzt das eigentlich wiiter goht.

Und es isch wie immer e super Show gsi!
Merci Jonny und Manu.

Vivi - 25-12-2013 um 20:19

Gate10 Horgen Das Zelt, 19. November 2013

Ich bin also Endi 2012 a Tickets für Endi 2013 cho… Jaaaa, Horge isch scho nanig ganz s Hallestadion und international sind d Divertimentos au nani, aber natüüürlich hemmer so wiit voruus planet :-) Ich bin denn mal na rasch chli id Staate usgwandered und denn irgendwenn au wiider heigwanderet und scho gli gli isch es November gsi.

Mini Begleitig namens Mami het denn so e knappi Wuche vorane feschtgstellt, dass sie ja erscht vo ihrem Schii-Weekend heichunt a dem Abig… Ich scho chli am hypere, will ichs nöd so han mit Sache wo mini Konzept durenand bringed… Mis Mami isch sehr organisiert und sehr flexibel und na spontaner. Vo dem her kes Problem, isch sii hald goge schiifahre und ich brav a dem Zischtig ad Uni und am Abig uf Horge. Isch ja ned so wiit gsi, nume es Dörfli wiiter.

Wonich so am siibni am Bahnhof stahn, lüütet mis Mami ah: Ihre Car segi in Chur, s heg stockende Verchehr... Ohhhh nöd guet, gar ned guet… Janu, chasch nüüt mache, bini hald zum Zält pilgered (han imeme sälte klare Gedanke sogar na gschnallt, dasses ja nüme de Schinzehof sondern e anderi Location isch… Ä blöd, wie wennds denn au s Zält inen Saal ine stelle…) Also bini mal chli is Zelt ine und han gwartet. Öbe am zwänzg ab siibni lüütet mis Mami wiider a: Sii schaffis, aber hald eifach hüne knapp.

Okeee, hemmer es chliises Problem, bestehend us folgende Faktore:
a) ich han BEIDI Tickets
b) eusi Sitzplätz liiged nöd nebedenand, s gäb aso chli es Glöitsch wemmer beidi knapp / z spaat chemted
c) mhh z spaat cho bi Divertimento… Schlächti Idee… Und u huere piinlich

Also hets Vivi ihri Glubscherli ufgsperrt und d Lösig gfunde… Sii isch knall-gääl gsi und i de Mitti vom Feuer gstande. De Info-Desk (überdütliche Sponsor isch Postfinance gsi). Also s isch zwar chli meh „desk“ und chli sehr wenig „info“ gsi det, aber mer wennd mal ned so sii… Vivi gaht also det hii, beamt sich es strahlends Lächle uf d Lippe und frögt di netti Dame hinderem Tisch, öb sii ächt chenti es Ticket bi ihre deponiere. D Begleitig chemi spöter und würds denn goge abhole, de Name stöchi uf em Ticket. Okey, grossi Auge hani geernet… Mhh vilicht isch ja au niemert so unorganisiert wie mir und sii het das na nie erlebt… „Wie bitte?“ Ohhhhhh, sii isch blond, dütsch UND Praktikantin… Und het mich offesichtlich nöd verstande :-) (Ich döf nüt gege Praktikante sege, ich bin selber immer wieder eini… Die sind armi)… Anyway… Nachdem mer erfolgrich d Sprach-Hürde gmeischtered hend, isch sii denn ihre Chef goge fröge, wo denn bestätiged het, dass mini Bitt aso absolut oke isch und mer das natürlich chan mache.

Guet, Hürde 1 „Ticket deponiniere“ gschafft. Bini also is Zelt. Läck isch das unübersichtlich, het chli viel Stüel da… Bini also zum nette Herr Chef-Platzaawiiser und hanem nach em Sitzplatz uf mim Ticket gfrögt und nach dem vo mim Mami, woni mer uf de Handrugge kritzlet han. Mhhh ich han ja gwüsst, dass ned di geilschte Plätz sind… Aber grad e soooooo hanis mer au ned vorgstellt. Platz 1 isch hine-links-irgendwo-5-kilometer-entfernt und Platz 2 isch rechts-hine-im-Egge-versteckt-im-Juhee-usse… Guet, chamer nüt dra ändere, gnüssemer de Abig gliich… Vivi suecht aso ihre Platz, chräsmet dur d Reihe dure (Ziit underdesse öbe zwänzg vor achti) und wot absitze… Wirdmer prompt aquatsch vonere nette Frau: Öbich ellei segi… si würd gern nebet ihrere Schwöschter sitze, öbich ächt chent Platz duusche…? Ja klar, ei Reihe meh vorne oder hine macht us dem Winkel au nüüt uus, mer sind ja schliesslich sozial und Wiehnachte isch au scho bald… Also chlettered d Vivi wiider über alles ine us de Reihe use und a ihre neui Platz (sind imfall na eng die Reihe!).

Ziit: Viertelvor und mis Telefon lüütet: Mis Mami: Sii laufi etz grad is Foyer ine… Ich: „Wart, ich chum der entgäge!“ (Han sii au es Ziitli nüme gseh gha und Hoi sege isch ja immer schön und nöd dass sii na verlore gaht). Bini also wiider usem Saal use, ferbi am Herr Chef-Platzaawiiser und zum Desk ohni Info wo mis Mami gsi isch. D Dame am Schalter het mich glaubs chli doof gfunde, wonich nebet mim Mami stehend wiider nach mim hinderleite Ticket gfrögt han ;-) Aber chan ja nöd wüsse, dass de Car so schnell isch und dass s Zelt grad nebt de Autobahn staht (ich glaub sii hend sii uf em Panestreife rasch lah uusstiige, damit sii pünktlich chunt).

Guet, es isch zeh vor, mir gönd richtig Zelt und ich erchläre minere Muetter, dass d Plätz chli scheisse sind, aber ebe, Schicksal. Nöd bi mim Mami, bi ihre gits so was nöd :-) Wemmers ned het, denn wird drum kämpft bismers het. Stömer wider bim Herr Chef-Platzaawiiser, frögten doch mis Mami tatsächlich, öbs ächt ned na zwei Plätz nebetenand het, will mir ebe so gern würded binenand sitze… Ohhh, binich i dem Loch versunke wo sich uuftah het under mir: „Mamiiiii, da sind 1400 Lüüt und d Shows sind über meh wienes Jahr voruus usverchauft… Klaaaar, gasch mal easy chillig zu dem Typ here und frögsch öber na besseri Plätz het…“ Han mich denn i mim Loch une scho chli welle heimelig iirichte, woni de Herr Chef-Platzaawiiser ghöre sege, dasses zwei Plätz i de 15 Reihe het, nebetenand… Die chengemer ha…!

Uiiiiiiiiiii läck du mir binich zu dem Loch usgefloge :-) Mir hend eus denn extrem fründlich bedankt, ich het en am liebschte umarmt, hans denn aber bimeme seeehr dankbare Lächle und drüütuusig Mal Merci glah.

Guet, am foifvor simmer eusi Plätz goge sueche. Reihe 15 isch grad di erscht gsi nach em Parkett 1 (hald eifach hinderem Gängli) und e huere gueti Reihe, für das, dassmer ja immerna di gliich Priis-Kategorie gha hend, wie die womer zahllt hend (so simmer denn scho ;-)) Super Blick uf d Bühni, Beifreiheit füren Giraff und mir beidi nebetenand. :-)

Läck, hemmir Party gha, na bevors überhaupt 8ti gsi isch :-)

A dere Stell rasch en riise masterpussypimprespect Applaus für de Herr Chef-Platzaawiiser, wo eus de Abig grettet hett! Bisch ächt en geile Siech, merci!

Pünktlich het denn au d Show ahgfange und ich muess gestah, ich chan eigentlich gar kein gschiide Bricht schriebe, willich mir nämmlich i de Nacht druf de DVD drü Mal inezoge han… Hans mer ebe vorane nöd erlaubt, willich s zerscht han welle live gseh. Und denn het sich i mim Chopf hald vor allem s dvd-ige Züüg abgspeichered und gar nüme so würklich das vo de Live-Show. Anyway…

Öbis vomer aber bliibe isch, isch de Afang gsi. Entweder isches u huere guet gspilt gsi oder ebefalls u huere guet spontan, aber uf all Fäll het det rächt viel offizielle Tegscht siitens Manu gfählt. Macht ja nüüt, isch au so extrem luschtig gsi und alli hend froid gha. Bis denn de Jonny gfunde hett, dass sii 150 Siite Programm-Tegscht heged, wo mer irgendwie i dene 2 Stund sötti durebringe und s drum guet wär, wenn de Manu mal wiider chli würd fokusiere… Hends denn au gmacht :-)

Vor de Bühne rechts hets e ganzi Gruppe Herre i Ahzüüg gha, also so richtig viiel, dasses dene zwei uf de Bühni grad uufgfalle isch… Sind Lüüt us IT-Branche gsi und natürlich es bitzeli höch gnah worde. S isch denn aber erscht perfekt worde, wo mer s männliche Opfer vo dem Abig namens Leonardo entdeckt het (de, wo nachane au het müesse d Laudatio halte). Will dä isch au en IT-Typ gsi und natürlich usgemobbt worde vo de andere Gäng vo links gsässe isch… Running Gags dur de ganz Abig, woni mer leider ned alli han chöne palte.

Bi de Knut-Szene diskutiered de Fredy und de Knut sehr iifriig über irgendöbis, woni nüme so gnau weiss und im Eifer des Gefechts redet au beidi ab und zue gliichziitig… Uf eimal, also so würklich us em nüt use, findet de Fredy-Manu: „Du, ich bin imfall Buuchredner, viilicht söttemer nöd gliichziitig rede….“ S Publikum hets verdätscht und die beide uf de Bühne au… Underdesse isches zumeme Programm-Satz worde, aber ich chent mer durchuus vorstelle, dass de uursprünglich in Horge mal rächt spontan gsi isch.

Allzuviel suscht zum Programm chanich gar nöd verzelle, aber uf all Fäll isches de Hammer gsi. I de Pause hemmer denn na euse Bankeheini-Chef ahtroffe, wo natürlich VIP-Programm gha het mit sine Gäscht. Mir sind denn spontan iiglade worde, nach de Vorstellig na ufes Cüüpli in VIP-Bereich z cho… S macht also rächt viel meh Spass ufes Autorgramm z warte, wemmer es Cüüpli-Glaas i de Hand het :-) Rächt edel gsi das :-)

Soodeli, eigentlich isch das gar ken Showbricht gsi, sondern meh e herzigi Gschicht, aber mer hend ja schliesslich Wiehnachte und denn döfmer au mal eifach so chli schöni Gschichte verzelle… ;-)

Und ich chan das glaub da gliich scho vorakündige…: De nägscht Showbricht isch bereits in Produktion und de wird also düütlich besser und uusfüerlicher…
Nume so viel voreweg: Ich bin vom mim Sitznachber (ächt nette Typ gsi, würklich!) ahghaue worde: „Bisch du vo de Press oder es Groupie?“ Ich hans denn mal als es Kompliment uufgfasst ;-)
Also mini liebe Divertimento-Fäns da usse, ich wünsch eu na wunderschöni Feschttäg! Gnüsseds!


funny_girl - 25-12-2013 um 21:20

Super gschribe Vivi. Mir isch jetzt grad vor lache fasch es Wiehnachtsguetzli im Hals stecke blibe :)

Und was lerned mer do drus: nöd vor em Computer esse. Scho gar nöd, wemmer im Forum lese will :lol::lol:

Cheyenne - 26-12-2013 um 00:56

Läck was e Krimi 😊 Merci für die Gschicht, wo wieder mol zeigt, dass es ab und zue doch no happy ends git😊 I like.

Vivi - 27-12-2013 um 22:29

Es isch Ändi Dezember, was ja automatisch au de Winter-Break vo de Divertimento Live-Shows bedütet. Und damit eus allne da nöd langwiilig wird und mir gliich amigs chli öbis z läse hend, hanich denkt, ich lade mal de Gate-10-Bricht vo de letschte Show vor de Pause ufe: Volkshuus Züri, 21.12.2013.
Ich han d Längi vo dem ganze Brichtli au chli dä Längi vo de Pause ahpasst… ;-) Was so viel heisst, wie s isch uuu huere lang worde und ich bin fäng i de Hälfti… Drum wird das ganze au jewiils Szene für Szene ufeglade… Wem das ganze z viel z läse isch, de chan eifach bis öbe Mitti Januar warte, will denn wirdi wahrschiinli fertig sii und denn gits eventuell na e Zämefassig:-)
(@ funny_girl: ich empfehle dir, das ohni Guetsli z läse… ;-) )

Casa di Volko 21.12.20013 - letschti Show vor de Winterpause
Highlights: Tanneboim, Engeli und Seehünd (jaja, es weihnachtet sehr…!)

Ahreis und vor-der-Shwo-igs
Mit Heimvorteil isch das natürlich kei Sache (und ohni Mami also au viel entspannter- siehe Showbricht vo Horge). Han mich pünktlich iigfunde und min Platz i de dritte Reihe, wo eigentlich di vierit gsi isch wills na sone halppatzigi Reihe 0 aneghänkt hend, iignah. Mer chan über Züri säge was mer wot, aber also d Stimmig isch zimli geil gsi während em ganze Abig! Ich find immer, mer merkt öbe i de erschte 3min wases füres Publikum isch… Klar, s git Späätzünder, aber meischtens ziiets sich denn dur de ganz Abig… Züri het vo de erschte Sekunde bis zur letschte ganz geil mitgmacht. Ohni Standing Ovation, obwohl ich mun sege, dass das eigentlich zweitrangig gsi isch… Wär en Abig lang so klatsched, stampfed, lached, schreit und joohled, dem seg au das verzeihe ;-) Wahrschiinli sind am Schluss all chli z kaputt gsi, zum da na gross ufzstah… Het aber de Stimmig gar e kein Abbruch da…

Legende zum Showbricht:
J= Jonny (egal öb innere Rolle oder nöd)
M= Manu (egal öb innere Rolle oder nöd
P= Publikum
Kursiv = Filmli
*….*= irgendwelchi Grüsch / Tön etc
(in Chlammere) = Anmerkung meinerseits
De ganz Tegscht isch meh oder weniger phonetisch gschriebe, eifach wills praktischer isch. Das ganzi isch e Mischig us Dialog, Mitschrift und persönliche Gedanke und Inputs…

Ich han eigentlich na welle kennzeichne, wemmer glached und klatscht het, aber das hetti denn de Rahme doch es birebitzeli gsprängt. Drum nur so hösch am Rand: Glached isch nach mindischtens jedere Pointe worde und mengisch au eifach so (mer hend schliesslich alli fescht froid gha). Klatscht isch afangs, nach und während jedere Nummere worde… Also eigentlich au immer… Also entweder bisch am lache oder klatsche gsi oder beides… Voll de stressig Job hesch da als Publikum ;-)


Sooodeli, let’s start: fascht pünktlich am drü ab Achti:-)

Flughafe-Filmli: Jonny und Manu kommen an.
(J&M auf)
M: Guete Abig Zürii! Züri uiiii uii (Züri isch grad e chli luut worde, passed doch uf de alti Volkshuus-Chaschte uuf, de Balkon hebt nüme so guet…)! (Zum Jonny: ) Ich fang ah, isch guet?
J: Fang nume ah, ja.
M: En wunderschöne guete Abig! Mini Dame und Herre, mir heissed Sii ganz, ganz herzlich willkomme hüt Abig da am International Airport vom Chreis 5.
J: Sii hends sicher mitbecho im Film oder au suscht: Siit zäh Jahr stönd mir gmeinsam uf de Bühni und us dem Grund flüge mir hüt id Ferie und nemmed Sii grad mit.
M: Genau, genau ich übernimme wieder…
J: Mach du numme…
M: *quitsch* ich bin grad e chli nervös, ähm, ich döf Ihne etz verrate wohere dass mir flüged…(zum Jonny) Ich segs etz?!
J: Ja, sägs nume.
M: Ich seges… Mir flüged nach Ibiza!
J: Ou nei sorry, das isch es Missverständnis, mir flüüged nemmlich uf Stockholm. Stockholm…
M: Neineinei, Ibiza hemmer gseit! Ibiza hemmer gseit!
J: Manu, ich find dich au luschtig, aber… Aber Nei… Sii kenned ja Stockholm, das isch e wunderschöni Stadt…
M: Wart mal gschnell… Jonny, Jonny… Ich find dich grad überhaupt nöd luschtig! Mir hend abgmacht! Ibiza hemmer gseit!
J: Manu, ich han die Reis bueched, ich weiss doch, wohere dass ich bueched han.
M: Nei, aber Moment…
J: Stockholm isch ja ebe e wunderschöni…
M: Moment, nur ganz gschwind… Ich weiss na ganz genau, ich han dich gfröged: „Jonny - das bisch du- chunsch mit mir uf e Jubiläumsreis?“
J: Genau…
M: Und denn hesch du gseit: „Ja, Ibiza!“ So ischs gsi!
J: Neinei, ich han gseit: „Ja i bi zha!“ Das isch piinlich!
M: Woanne gömmer etzt?
J: Jetzt flügemer uf Stockholm.
M: Ja bravo Hockstolm, wo isch denn Hockstolm wo?
J: Das isch im Norde.
M: Was?! Das isch obe?!
J: Ja, das isch richtig.
M: Ja, etzt hanich föllig falsch packt! Und ich chan imfall keis Wort russisch!
J: Sii, mir sind eus eigentlich vo Afang ah einig gsi, wohere dasses söll gah… Nemmlich in Norde!
M: (parallel) Süde!
M: Süde, Süde! Abe hemmer gseit!
J: Das würkt etzt huere blöd!
M: Peinlich isch das…
J: Entschuldigung, normalerwiis hemmer di gliich Meinig… Guet, mir hend natürlich au Höchs und Tüüfs… Aso vor allem Tüüfs…
M: (parallel) Höchs! Höchs Höchs, mir hend vor allem u huere Höchs! U huere Höchs hend mir! Nei würklich, au nach solanger Zemearbeit, zehn Jahre, würklich, mir chönd mit guetem Gwüsse behaupte au nach so langer Ziit, mir hends würklich immer guet gha, mit mir! Würkli! Ja, Sii chönd sich au vorstelle, nach so langer Ziit da kennt mer sich in und uswendig…
J: Jedes Detail!
M: aber in und uswendig! *zwei Oktave höcher*
J: Alles…
M: De Michi und ich, mir hend… Nei, wie heissisch?!
J: Ja Jonny!
M: De Charlie und ich mir hends…
J: Nei hör etzt… Jonny wie dä… wie dä…. Jonny Depp!
M: De Depp und ich ... Egal…
J: Nei, natürlich hemmir au Schwächene und mir hend gfunde hüt chömir au chli Transparenz zeige und Ihne vo dene schwiirige Siite vo üüs verzelle und…
M: Ja musch ned z viel verrate!
J: S git öbis wo de Manu brutal Müe het, äh…
M: Was verzellsch etz?
J: Ich weiss nöd öb Siis kenned: Im Resterant gits doch mengisch Kätschöp-Fläschene und…
M: Nei, Jonny hörsch uf!
J: Und mengisch gits Kätschöp-Büteli…
M: Jonny, hörsch uf biseguet, Jonny ufhöre. Duesch etz sofort uufhöre… Jonny bitte ufhöre! *immer höcher und schneller*
J: Spinnsch du?
M: Ich wird scho nume vom dra dänke chribbelig!
J: Spinnsch du?!
M: Uuu die schiis Kätschöb-Büteli! Känned Sii das?! Die chline, schlüpfrige … Soubüüteli, die chline! Da hättmer ja, da hettmer ja, ich mein, da hettmer… Läck das macht mich hässig!
J: Ja, ich merkes…
M: Da hettmer ja meischtens vo de Pommfritt scho mal fettigi Finger und bringt die Sieche nöd emal uuf! Das beschäftigt mich amel na wuchelang! Da ghei ich ines Läbestüüf! Sind Sii ehrlich… (zum Jonny) Bi grad sowiit! Sind Sii ehrlich, die chline, viereggige Schiisbüteli, die chline, die sind doch e massivi Beiiträchtigung vo eusere Läbesqualität! Huuuu ich mus eis go rauche! (Manu ab)
J: Nei Sii, das isch doch piinlich, ich mein de raucht ja nöd emal!
M (auf): Jonny, Jonny, Jonny ich rauch ja gar nöd!
J: Ja super, bravo, lässig!
M: Dihine hanis gmerkt!
J: Jajaja…
M: Dusch bisseguet s Thema wächsle!
J: Ja s duet mer leid, ich han chli es schwiirigs Thema… (berüehrt Manu)
M (ufbracht): Dusch mich nöd allange bisseguet!! Das hani nöd gern!
J: Ja hesch au chli überreagiert!
M: Nei, das hani nöd gern…
J: Ja Sii… (berüehrt de Manu wiider)
M: Hörsch uuuf! Etz bini würklich hässig! Eschoffiert!
J: Jajaja…
M: Läck binich am schuume…!
J: Jaja mer gsehts und schwiitze dusch au scho wiene Sau!
M: Ja, sisch au heiss.
J: Ja für Sii isch das luschtig, da vorne stinkts. Nei Sii… (berüehrt de Manu)
M: Nei hörsch uf bissoguet! Nimmsch mich ernscht!
J: Ja das isch huere schwiirig! (Hihi, mengisch muesch au chli ehrlich sii… Aber am Grinse sinds beidi gsi…)
M: Ich wett ächt dasses fär bliibt, oder will etzt hett er vo mir, also ich, chan ich vo ihm au… Chanich… also… Uuuuuhhh! De Jonny hät imfall au e Schwächi!
J: Ja guet, das stimmt.
M: Ja sehr wohl sogar! De Jonny – ich chans verrate- de Jonny dä het ja sone, wie sölli sege, sone Unentschlosseheit…
J: Ja guet, ich meine das stimmt etzt also nöd, ich han viiel Schwächene aber die Schwächi…
M: Doch doch, das isch ekelhaft zum Zemeschaffe mit dir, würklich! Hanich dir scho lang mal welle säge! Würklich!
J: Das seisch du mir jede Abe! (Dä schüüchi Versuech vom Jonny ernst z bliibe isch aso zmindescht i de vorderer Reihe erchännbar gsi… Gnützt hets nöd viiel… :-) )
M: Das wüssed d Lüüt nöd! (Spötischents da händ also beidi müesse lache…)
J: Ohhhhh doch, das wüssed d Lüüt! Jede weiss, dass du das jede Abe seisch!
M (na halbe am Lache): De Jonny het e sone Unentschlosse…, eine so…, eine Entscheidungsschwierigkeit! Villicht kenned Sii au so Lüüt, das isch Lüüt wo, jajaja (Darstellung von Entscheidungsschwierigkeit à la Manu)… Ich chan Ihne säge: Fachlüüt, Fachlüüt schwätzed bi ihm sogar vonere – ich hans ebe abkläre lah- vonere sogenannte Pränatale Entscheidigschwierigkeit. Jaja, de het scho bi de Geburt nöd gwüsst, welle Uusgang dasser muess näh… Ja, das mun mer sich emal vorstelle!
J: Nei, das dümmer ois lieber nöd vorstelle!
M: Nei, das isch etzt eifach damits e chli fäär bliibt, au öbis wonich eu wet verrate, das isch, das isch öbis…(zum Jonny) Was chent ich vo dir na? Ui, ui! Döfich, Jonny, döfich das verzelle, döfich das verzelle… Ebe gell, ich döfs verzelle!
J: Was, was?
M: De Jonny, das wüssed ganz viil Lüüt nöd, de Jonny het ja e chli Müe mit sim richtige Taufname!
J: Hee spinnsch du eigentlich?!
M: Und denn hanich denk…
J: Ich verzell da chli vo Kätschöp-Büteli und du chunsch mit private Gschichte hinefüre!
M: Nei, die hend doch Iitriit zahlt, die döfed doch au öbis erfahre…
J: Ja über mich, ja super!
M: De Jonny, de Jonny de heisst ja tauft…
J: Ja bravo!
M: Aso ja, er finds schlimm… Ich finds gar nöd so… Isch scho na rächt schlimm!
J: Ja isch guet jetzt!
M: De Jonny heisst tauft, heisster, Jooooonathaaaaan!
J: (zu Mann in erster Reihe) Was lachsch Du e so saublööd, das isch es agressivs Lache gsi (willer sälber muen lache isch das mit em hässig-sii nöd ganz so würkigsvoll gsi wie au scho, defür huere luschtig) (immerna zum Maa i de erschte Reihe) Etz bisch grad e chli verschrocke, gell… Er het nemmli gar nöd glached, aber du bisch de einzig Maa da vorne! (Okay, das fangt ja schomal super ah mit eusem Tages-Kandidat… griiins) Ich muess eine ha! Wie heissisch du denn? (Nume so hösch Anmerkung meinerseits: Ächt jetzt, ein Maa i de erschte Reihe?! Wo sind denn alli Päärli ane? Numena Fan-Girls ume?)
P: Pascal.
J: Pascal, und wie na?
P: Pascal äh Adrian…
J: Pascal Adrian, sehr schön! Hesch du au na en Nachname?
P: *nicken*
J: und wie goht de? (Hanich scho mal erwähnt dassich em Jonny sis Improvisationstalent liebe?! Wenn nöd, das wär de erschti gloorrichi improvisierti Moment vo dem Abig, viili wiiteri wärded na folge…)
P (unverständlich fürs Publikum i de hindere Reihe) …
J: Ahhh Ängler…
J: Ouuu passt grad zu Wiehnachte! (de Jonny flügt eimal rund um d Bühni, s het sölle en Ängel darstelle, het mich aber chli ad Ballerina erinnered, eifach mit Flügel… Dä Manu staht währenddesse i de Mitti vo de Bühni und vergröölt sich ab de Situation, wie s ganze Publikum au… Suurstoffzält, wo bisch, Nr 1! Eifach en grandiose Nachname für di letschti Show vor Wiehnachte, da sind natürlich d Running-Gags für de ganzi Abig scho mal bueched gsi! Spötischtens da händs also ganz Züri überzügt gha… Schaad gits kei Video-Ufnahme vom Ängeli-Jonny, s wär also na öbis gsi fürs Farb-Fernseh… Sehr graziöös!)
J: Also guet, ähhhm… (Aha, mer müend ja wieder zrug zum Tegscht finde... Isch glaubs na schwierig gsi, sowie de Manu na immer am lache gsi isch…) Pascal, du hesch en geile Name! Ich mues mich überall erchläre: Ja Jonathan hebräisch, mit The Haa und soo. Obwohl ich mun erliich säge im Uusland binich gern. Ängland: Tschonäfän, Italie Tschonathan, in Frankriich: Schonatooong….
M: Spanie: Chchchchonatan! (mit viiiiiiel Spoitz) Uiii, han grad e Paelia gleit, het aber na es spannends Muschter gäh!
J: Jajaja…
M: Es Ängeli! (kei driisg Sekunde nach de erschte Bekanntschaft mit em Herr Ängler wär di erscht Pointe scho mal da…)
J: Ja guet… Sii abschlüssend möchte ich… (ei Hand berührt biiläufig de Manu)
M: *liislig* Nöd ahlange bissoguet!
J: Tschuldigung. Abschlüssend gits na öbis, ich weiss nöd öb Sii das wüssed: Ich bin ja bedütend viel jünger als de Manu.
M: Ja etzt chunsch mer denn öbe fräch dether, Bürschtli!
J: Das isch dänk es Witzli gsi!
M: Ja Witzli, Witzli, Witzli! Irgendwenn isch denn bim Schöbeli au mal fertig mit Witzli! (mit Spoiz in Richtig Jonny)
J: Ja wunderbar!
M: Tschuldigung…
J: Das ghört zu euesem Tschob: Uf de Bühni stah und Witz mache…
M: Vo dem weiss ich nüüt!
J: Ja das staht denk im Vertrag under Eis Punkt Eis…
Stimme aus dem Off: …der LX 2002 nach Stockholm vom Gate 10…
M: Das isch ja euse…
J: Pscht!
Off: Die Abflugszeit verschiebt sich um zirka neunzig Minuten…
M: Scheisse!
Off: Der Pilot hat versehentlich beim stehenden Flugzeug das Fahrwerk eingefahren!
M: Ja nei, das isch doch jetzt en Seich, Himmel wart ich mun ja na go iitschegge!
J: Ja isch guet, ich warte mit em Handgepäck.
M: Ja hesch du denn dis Gepäck überhaupt ahgschriebe?
J: Ja hine. Hine isch s Zeddeli.
M: Ah ja, Jooooonathan!
(M & J ab)
-------------------------------------------------------------------------
So, das wärs mal gsi für hüt :-) Schöni Nach-Wiehnachtsziit eu allne!

 Seiten:  1